فوق رأي

حجم الخط: Decrease font Enlarge font

 مقولات الأمهات (1)
هناء إبراهيم

على سبيل التغيير نكتب هذا الأسبوع عن أبرز المقولات المشتركة التي تقولها الأم السودانية ونبدأ بالجزء الخاص بتعب الأبناء..
(بخُت توبي دا في رأسي وبمرق أخلي ليكم البيت دا)
حيث أنها مستعجلة على (الطفشة) لدرجة لا تستطيع معها لبس ثوبها كاملاً.. هذه الجملة تقال كل يوم وإلى اليوم لم تطفش أم من أبنائها.
(نشفتوا ريقي الله ينشف ريقكم)
أساساً يجب أن تكون هناك كورسات للأمهات للتعامل مع (نشاف الريق) هذا... ثم الأبناء في هذا الزمن بنشفوا الريق والجيوب.
والله بس الله يلزمكم الصبر.
(أبوكم ما جايبني ليكم هنا شغالة)
(الحمار وِلِد ما استراح)
نصيحة ما تاخد بالك من دي شديد... عشان خاطر نفسياتك
والله جد..
(بتقتلوني وتقعدوا)
بُعد الشر عليك
(داير توريني لماضتك يعني... داير توريني عروضك)
حين تقوم بتصرفات لا تعجبها... تصرفات تجعلها تتحسَّر على تربيتها لك.. وعروضك نسبة لأنك الآن ملك المسرح.
الله يهديك يا ابني..
(متين أصبحت للمشاكل)
اسأليهم عليك الله..
(أنتوا تسووا الشحتافة)
(أنت الله يحضرني زمنك)..
دا ياهو ذاتو زمنو..
(كل ما كبران كبران في العوارة)
ما شاء الله تبارك الرحمن
(الله يقطع النت وسنينو)
عموماً النت قاعد يقطع باقي سنينو
(عليتوني... أنتوا تجيبوا المرض)
(وينن النسوان الكايسات الولادة ديل.. يجن يشوفنكم عشان يحردنها)
(أنتوا تجيبوا الجلا)
(أنتوا العاقر ما بتتمناكم)
(تعالي كفيتني بالله)
دي لما الكلام ما يعجبك وتصر وشك كـ (لميض)
(إقرش حلقومك)
هذه الجملة تعتبر متلازمة (طلب المصاريف)
(دا عمارك)
الجملة دي قاتلة جداً على فكرة
أقول قولي هذا مع كامل محبتي واحترامي.. فقط على سبيل الرصد والانتباهة.
ونواصل بكرة إن شاء الله....



الإشتراك في تعليقات نظام RSS التعليقات (0 مرسل)

المجموع: | عرض:

أضف تعليقك

  • عريض
  • مائل
  • تحته خط
  • إقتباس

من فضلك أدخل الكود الذي تراه في الصورة:

Captcha
  • أرسل إلى صديق أرسل إلى صديق
  • نسخة للطباعة نسخة للطباعة
  • نص عادي نص عادي

قيم هذا المقال

0